ALUTE: "HAKIKISHENI MIRADI INAKAMILIKA KWA WAKATI NA KWA UBORA"

Posted on: December 21st, 2024

Katika Juhudi za Kuhakikisha Miradi ya Serikali inakamilika kwa wakati na ubora unaotakiwa, Kamati ya Ufuatiliaji wa Miradi kutoka Ofisi ya Mkuu wa Mkoa wa Iringa imefanya ziara ya ukaguzi wa miradi mbalimbali ya afya na elimu iliyopo katika Halmashauri ya Manispaa ya Iringa kwa lengo la kuona hatua iliyofikia na kujua changamoto zinazoathiri maendeleo.

Ziara Hiyo imefanya Ukaguzi wa Miradi ya Ujenzi wa Kituo cha Afya Kitwiru na Miundombinu katika Shule ya Sekondari Kwavava (Kata ya Kitwiru), Mabweni 2 kwa wenye mahitaji maalumu - Shule ya Msingi Ipogolo (Kata ya Ruaha), Ujenzi wa Kichomea taka, Stoo ya Dawa na Jengo la Upasuaji Hospitali ya Frelimo, Bwalo la Chakula Shule ya Sekondari ya  Kwakilosa (Kata ya Kwakilosa), Jengo la Kitega Uchumi (Kitanzini Community Welfare) na Choo katika Shule ya Sekondari Miyomboni (Kata ya Kitanzini).

Kiongozi wa Timu hiyo kutoka Ofisi ya Mkuu wa Mkoa wa Iringa, Kaimu Katibu Tawala Msaidizi Sehemu ya Mipango na Uratibu, Mchumi John Alute amesema kuwa lengo la Ziara hiyo ni kuangalia hali ya Maendeleo ya Ujenzi wa Miradi hiyo na kuangalia changamoto zilizopo ili zitatuliwe kwa wakati na hatimaye Miradi hiyo kukamilika kwa ubora na muda uliopangwa ili ikawahudumie wananchi.

Hata hiyo muendelezo wa ziara hiyo umeongozwa na Kaimu Mkurugenzi wa Halmashauri ya Manispaa ya Iringa Ndg. Elias Mvula pamoja na Wataalamu mbalimbali wamefanya Ukaguzi wa Miradi ya Ujenzi wa vyoo katika Shule ya Sekondari Mkwawa, Shule ya Msingi Mkimbizi, Shule ya Msingi Mgongo, Shule ya Msingi Kipululu, Shule ya Msingi Gangilonga na Zahanati ya Nduli.

Vilevile, Timu hiyo imekagua Ujenzi wa Shule mpya ya  Sekondari Makorongoni  katika Kata ya Nduli (Chini ya Mradi wa SEQUIP) ambapo inaendelea na Ujenzi wa Jengo la Utawala, Madarasa 4, Vyoo, Maktaba,  Maabara ya Fizikia, Bailojia na Kemia. Pia, wamefanya Ukaguzi kwa umaliziaji wa vyumba vya Madarasa, Ofisi na Nyumba ya Walimu S/Msingi Kigonzile na Ujenzi wa Bwalo la Chakula Shule ya Msingi Mapinduzi. ambapo, Miradi yote ipo katika hatua nzuri.

Aidha, Mvula Amewataka Wasimamizi wa Miradi hiyo kuhakikisha wanaikamilisha kabla ya Disemba 31, 2024 kama agizo la Mkuu wa Mkoa linavyosema, pia amewashauri wamtumie Mhandisi wa Halmashauri katika kufanya tathmini za gharama zinazotakiwa kwenye Miradi ili kuhakikisha thamani ya fedha za Mradi inaendana na ubora wa miradi.