DKT. LINDA AAPISHWA DC MUFINDI

Posted on: February 3rd, 2023

Mkuu wa Mkoa wa Iringa Mhe.Halima Dendego leo Marchi 3 2023 amemuapisha Mkuu wa Wilaya ya Mufindi Dkt.Linda Paniel Selekwa.

Hafla hiyo imefanyika  katika ukumbi wa Masiti uliopo Kata ya Gangilonga Manispaa ya Iringa na kuhudhuriwa na Viongozi mbali mbali wa Chama,Serikali, Viongozi wa dini,Wakuu wa Taasisi,wakuu wa Sehemu na Vitengo na wananchi.

Akiongea katika  hafla hiyo Mhe.Dendego amewataka wakuu wa Wilaya kwenda kufanya kazi kwa ushirikiano kutenda haki na kuleta maendeleo kwa wananchi wa Mkoa wa Iringa.

Aidha  Dendego ametumia fursa hiyo kutangaza mafanikio ya Serikali ya awamu ya sita Mkoani Iringa ambapo amemshukuru Rais wa Jamhuri ya Muungano wa  Tanzania Mama Samia Suluhu Hassan kwa kutoa fedha nyingi za Miradi ya Maendeleo ambayo imetekelezwa katika Sekta ya Afya,Elimu na Miundombinu na kutatua  changamoto zilizokuwa zikiwakabiri wananchi.

Daudi Yassin ni Mwenyekiti wa Chama cha Mapinduzi Mkoa wa Iringa amesema wajibu wa Chama na Serikali ni kuondoa kero za wananchi hivyo wameandaa mikakati kabambe ya kuwafikia wananchi wa maeneo yote Katika Mkoa wa Iringa na kuhakikisha wanasikiliza kero na kuzitafutia ufumbuzi.

Akiongea mara baada ya kuapishwa Mkuu wa Wilaya ya Mufindi Dr.Linda Selekwa amesema atafata haki na katiba ya Jamhuri ya Muungano wa Tanzania katika kutekeleza majukumu  yake na kuomba ushirikiano.

Mkuu wa Wilaya ya Iringa Mhe.Veronica Kesi amemshukuru Rais kwa kuendelea kumuamini na kumteua tena na kuomba ushirikiano ili aweze kutekeleza majukumu yake huku akifurahia kufanya kazi katika Mkoa huu.