MTAA KWA MTAA NA MSIGALA: Kamilisheni Miradi kwa Wakati- MD Msigala

Posted on: November 13th, 2023

Mkurugenzi wa Halmashauri ya Manispaa ya Iringa Ndg. Kastori Msigala amewataka wasimamizi wa miradi kuhakikisha wanasimamia ipasavyo miradi hiyo ili iweze kukamilika kwa wakati.

Msigala amesema hayo katika Muendelezo wa Ziara yake inayojulikana kama “MTAA KWA MTAA NA MSIGALA” iliyofanyika Novemba 11 na 12, 2023 katika Kata ya Kitwiru.

“Nasisitiza hakikisheni mafundi wanafanya kazi ipasavyo ili muweze kukamilisha miradi kwa muda uliopangwa, ila sio eneo la ujenzi linakuwa limepoa kwa sababu ya uchache wa mafundi”. Amesema Msigala

Miradi iliyokaguliwa ni pamoja Ujenzi wa Maabara ya Zahanati ya Itamba, Ujenzi wa madarasa mawili Shule ya Msingi Itamba, Ujenzi wa nyumba za watumishi mbili Shule ya Sekondari Isakalilo, Ujenzi wa mabweni Shule ya Sekondari Mawelewele, Umaliziaji wa Shule mpya ya Msingi Kitwiru na darasa la awali, Ujenzi wa jengo la Kitega Uchumi Welfare na Tembo Bar.