TIMU YA MPIRA WA PETE IRINGA YAAGWA RASMI

Posted on: October 20th, 2023

Mkurugenzi wa Halmashauri ya Manispaa ya Iringa Ndg. Kastory Msigala ameiaga Timu ya mpira wa Pete ya Manispaa leo Octoba 20, 2023 kwa kuwatakia ushindi katika Mashindano ya Michezo ya Watumishi Serikali za Mitaa (SHIMISEMITA) yanayofanyika Jijini Dodoma.

“Niwatakie baraka na ushindi katika mashindano haya natarajia Halmashauri ya Manispaa ya Iringa itakuwa namba moja na kupeperusha bendera ya manispaa hii, kwa sasa mnakwenda wachache ila natumaini kwa mwaka ujao 2024 mtakwenda wengi zaidi, hivyo niwatakie safari njema na mkarudi na ushindi” Amesema Msigala

Nahodha wa timu hiyo Zaujati Mdemu ameeleza lengo la Mashindano ya Michezo ya Watumishi Serikali za Mitaa (SHIMISEMITA) ni kuongeza ufanisi na kufahamiana na wafanyakazi wengine kutoka katika Halmashauri mbalimbali ndani ya Tanzania.

“Tunashukuru sana kwa baraka zako kwetu na mimi nakuahidi kurudisha ushindi nyumbani katika mashindano haya kwani lengo ni kuwakutanisha watumishi wa Manispaa zote nchini, kufahamiana, kuongeza ufanisi wa kazi zaidi, kujenga mshikamano na ushirikiano baina yetu pamoja na kubadilishana uzoefu wa kazi” amesema Zaujati

Aidha ameongeza kwa kuahidi kudumisha maadili na nidhamu baina wa watumishi kwaajili ya kurejea na ushindi.