BARAZA LA MADIWANI LAIPONGEZA MANISPAA YA IRINGA KWA UTEKELEZAJI WA MIRADI YA MAENDELEO

Posted on: May 6th, 2021

Baraza la Madiwani Manispaa ya Iringa chini ya  Mwenyekiti Mstahiki Meya Mhe. Ibrahim Ngwada leo tarehe 6/5/2021 limefanya ziara ya robo ya tatu (Januari-machi 2021) ya kutembelea na kukagua miradi inayotekelezwa na Manispaa kwa lengo la kuona mafanikio na changamoto zilizopo katika miradi hiyo

Akiongea katika ziara hiyo Mhe. Ngwada amempongeza Mkurugenzi wa Halmashauri Hamid Njovu  pamoja na wataalam  kwa kujenga miradi mingi ya maendeleo kwani itatatua changamoto za wananchi katika Sekta ya Afya,Elimu,Maji na zingine

Aidha Mhe. Ngwada amewapongeza wadau mbalimbali waliojitokeza kutoa misaada ya fedha na vifaa vya ujenzi kuhakikisha miradi hiyo inakamilika na kunufaisha wananchi wa Manispaa

Amesema wadau walioifadhili Halmashauri kufikia malengo hayo ni pamoja na Kampuni ya ASAS DAIRIES na IRUWASA na kuwashukuru kwa msaada mkubwa walioutoa katika Manispaa ya Iringa

Miradi iliyotembelewa na kukaguliwa ni  pamoja na Ujenzi wa Shule mpya ya  Sekondari ya Kigungawe, Ujenzi wa Jengo la Utawala stendi mpya lgumbilo, Ujenzi wa Bweni na Maabara shule ya Sekondari Mawelewele na ujenzi wa Bwalo shule ya Sekondari Kwakilosa na Mingineyo

Aidha Ngwada amewataka wataalamu kutumia vizuri fedha ili thamani ya miradi iendane na fedha iliyotolewa pia  kuhakikisha miradi hiyo inakuwa na ubora uliokusudiwa pia amesema ipo haja ya kuwepo na ziara ya kukagua na kutembelea miradi ya maendeleo kila robo (kila baada ya miezi mitatu) kwani itasaidia kuhamasisha utendaji wa kazi na kuleta msukumo wa ukamilishaji wa miradi  kwa wakati

Mh. Eliud Mvela ni mjumbe wa Baraza la Madiwani ametoa rai kwa wataalamu kufanya kazi kwa weledi kwani wameaminiwa na Serikali kutumia taaluma zao katika kuiletea Halmashauri Maendeleo, pia ameagiza wasimamizi wa  miradi inayosuasua kuhakikisha inakamilishwa kwa wakati uliopangwa

Kwa upande wake Naibu Meya wa Manispaa Mhe, Kenyata Likotiko amewataka wataalamu kuwashirikisha wanachi kuanzia  mwanzo  wakati ujenzi unaanza ili  waweze kuchangia nguvu zao  kwani kwa kufanya hivyo itaondoa malalamiko. Kwa wananchi kutokushirikiswa katika miradi inayotekelezwa

Hamid Njovu Mkurugenzi wa Manispaa ya Iringa amesema ameshukuru Baraza kupokea Miradi hiyo na kuahidi kutoa ushirikiano zaidi katika umaliziaji wa ujenzi wa miradi hiyo kwa manufaa ya wananchi.