DC IRINGA AONGOZA VIONGOZI, WATAALAMU WA HALMASHAURI YA MANISPAA YA IRINGA KWENDA KUJIFUNZA MOROGORO JINSI YA KUWAPANGA MACHINGA

Posted on: October 12th, 2021

MKUU wa wilaya ya Iringa Mohamed Moyo amewaongoza watalaamu na viongozi wa Halmashauri ya Manispaa ya Iringa kwenda mjini Morogoro kujifunza namna nzuri ya kuwapanga wafanyabiashara ndogo ndogo ( Machinga) katika maeneo yao .

Ziara hiyo iliyofanyika  hivi karibuni  ni sehemu ya maandalizi ya Utekelezaji wa agizo la Rais Samia Suluhu Hassan juu ya Halmashauri zote kuwapanga machinga kwenye maeneo sahihi .

Ziara hiyo imeongozwa na mkuu wa Wilaya ya Iringa Mhe.Mohamed Moyo,akiwa ameambatana na   Mstahiki Meya na Naibu Meya wa Halmashauri ya  Manispaa ya Iringa, Mkurugenzi,Madiwani, Mwenyekiti wa CCM Wilaya  na wataalamu kutoka Idara mbalimbali.

Akizungumzia lengo la  ziara hiyo Moyo alisema  ni kupata mafunzo ya namna wenzao walivyofanikiwa  kuwaondoa machinga kwenye barabara,mitaro na kuwapatia sehemu rasmi ya kufanyia biashara zao.

Moyo alisema kwenye ziara hiyo wamepata somo kubwa,wakirudi Iringa watakaa na kutafakari, na kuyatendea kazi waliyojifunza kwa kuwashirikisha na kuwapatia  maeneo ya kufanya biashara machinga wa wilaya yao na  kuhakikisha maagizo ya Mhe Rais wanayatekekeza kwa usalama na utulivu bila ya fujo yoyote.

"Kweli ni niupongeze uongozi mzima wa Morogoro,wameweka mawazo yao pamoja mpaka kufanikiwa kwa machinga kuwa kwenye maeneo mazuri,na jinsi gani wataalamu wanavyo shirikiana na machinga,zaidi Mambo yamekuwa shwari hapa Wilaya ya Morogoro,"alisema Moyo.

Mstahiki Meya wa Halmashauri ya Manispaa ya Iringa mhe: Ibrahim Ngwada, alisema wamepata fursa ya kutembelea vyanzo vingine vya mapato vya Halmashauri ya Manispaa ya Morogoro ikiwemo ukumbi wa community center ambao kwa sasa umeboreshwa sana.

"Sisi pia tunalo eneo la Maendeleo la community center,ambalo nia yetu ni  kuliboresha,kweli wametufundisha na kuweza kuona namna community center ipo na inavyowasaidia kuingiza mapato ya Halmashauri,"alisema Mhe. Ngwada.

Alisema  wamejifunza jambo kubwa baada ya kutembelea stendi ndogo ya Morogoro kwani wamehamishia baadhi ya vitengo katika eneo hilo,hivyo wamepata mawazo na wataenda kutafanyia kazi katika Halmashauri yao.

"Kikubwa niseme tumekuja Morogoro  na ziara yetu imekuwa na mafanikio na tumejifunza  zaidi,"amesema.

Kwa upande wake Mwenyekiti wa CCM Wilaya ya Iringa Manispaa  Said Rubeya alisema wamejifunza  jinsi gani ya kushughulikia  wafanyabiashara wadogo ambao wengi ni vijana wao bila ya kuwaumiza.

Kaimu mkurugenzi wa Manispaa ya Iringa Omary Mkangama alisema watakwenda kutekeleza agizo la mhe Rais  Samia   kwanza kwa kupeleka mawazo katika vikao vya kisheria  na kufuata taratibu zote ikiwemo kuwashirikisha wafanyahiashara ndogo ndogo azma ya  kutekeleza agizo la  Rais

Naye Michael Walusi kaimu mkurugenzi wa Manispaa ya Morogoro,alisema ziara ya viongozi hao kutoka Wilaya ya Iringa ni muendelezo wa Manispaa ya Morogoro kupokea wageni ambao wanakuja kwa ajili ya kujifunza  namna walivyofanikiwa kuwaondoa  wajasiriamali wadogo wadogo na Machinga ambao waliokuwa wametapakaa maeneo mbalimbali na kufanya biashara zao bila utaratibu.