JAMII IMETAKIWA KUJIKINGA NA MAAMBUKIZI YA VIRUS VYA UKIMWI

Posted on: December 1st, 2021

WANANCHI wa Halmashauri ya Manispaa ya Iringa wametakiwa kuwa chachu ya mabadiliko na kutambua kuwa wana jukumu la kujilinda wenyewe ili kupunguza kasi ya maambukizi ya Virusi Vya Ukimwi(VVU) katika halmashauri hiyo.

Wito huo umetolewa na Mstahiki Meya wa Halmashauri ya Manispaa ya Iringa Mhe. Ibrahim Ngwada,wakati wa maadhimisho ya siku ya UKIMWI duniani ambayo huadhimishwa kila ifikapo Disemba Mosi ya kila mwaka, ambapo kwa mwaka huu  halmashauri hiyo imeadhimisha katika chuo kikuu cha Ruaha Catholic  University(RUCU)kilichopo  Manispaa ya Iringa.

Mhe.Ngwada amesema ni kweli maambukizi yapo kwa kiasi kikubwa katika halmashauri  hivyo jukumu lao ni kujilinda.

"Sisi wenyewe tunapaswa kuwa chachu ya mabadiliko kwani jukumu kubwa ni kujilinda tu,"amesema Mhe.Ngwada.

Pia amesema,hali ya unyanyapaa katika halmashauri imepungua huku akitoa ushauri kwa vijana kutumia kinga ili kuepukana na  ngono zembe ambazo zinaweza kuhatarisha  afya zao.  

Mmoja wa watu walioathirika na VVU Paulo Kiwela,amesema ameishi na virusi hivyo takribani miaka mitano huku akitumia dawa za kufubaza VVU.

Ambapo anaishi vizuri bila tatizo lolote hivyo  alitumia fursa hiyo kuwashauri watu kujitokeza kupima bila kuamini imani za kishirikina ili pindi watakapo bainika kuwa na maambukizi ya  virusi vya ukimwi waanze kutumia ARVS.

Kwa upande wake Afisa Ustawi wa Jamii wa Manispaa ya Iringa Tinieli Mbaga,alitumia fursa hiyo  kuwaeleza wananchi juu ya kuzingatia masuala ya malezi chanya kwa watoto ili kuwatengenezea msingi mzuri huku akisisitiza juu ya kupinga  ukatili wa kijinsia,kimwili na kingono.

Pia amewasihi wahanga wote wanaokutana na  vitendo vya ukatili  kuhakikisha wanapambana kikamilifu ili kuutokomeza kwa kushirikiana kikamilifu na Serikali.

Sanjari na hayo amesema kwa yeyote ambaye  atashuhudia,kuhisi au kufanyiwa  vitendo vya ukatili atoe taarifa katika vyombo husika vya serikali kama ofisi za ustawi wa jamii na dawati la jinsia  ili kupunguza na kuweza kutokomeza ukatili wa kijinsia kwa watoto na akina mama.

Aidha Mganga Mkuu Dr.Jesca Lebba.amegusia suala la chanjo dhidi ya UVIKO_ 19 kuwa  inapatikana na haina madhara yeyote hivyo amewataka wananchi kuendelea kujitokeza kupata chanjo hiyo.

Katika maadhimisho hayo mbali na Msahiki Meya pia yalihudhuriwa na Naibu Meya mhe. Kenyata Likotiko na baadhi ya Madiwani wa Manispaa,wakuu wa Idara na vitengo.