KAMILISHENI MIRADI WANANCHI WAPATE HUDUMA -RC SENDIGA

Posted on: June 8th, 2022

Mkuu wa Mkoa wa Iringa mhe.Queen Sendiga  ameagiza ifikapo Agosti mwaka huu, ujenzi wa bweni la wanafunzi wenye  mahitaji maalum katika shule  ya msingi Ipogolo uwe umekamilika.

Mhe.Sendiga ametoa maagizo hayo June 8 alipokuwa katika ziara ya kikazi ya ukaguzi wa miradi mbali mbali inayotekelezwa na Halmashauri ya Manispaa kwa kutumia fedha kutoka Serikali kuu na mapato ya ndani.

Aidha mhe Sendiga amemtaka Mkurugenzi kuweka mikakati madhubuti ambayo itafanikisha ukamilishaji wa bweni hilo   kwani likikamilika litaondoa adha ya wanafunzi hao inayowakabili hivi sasa.  

'Serikali imetoa fedha ili kujenga bweni kwa lengo la kuwafanya wanafunzi hawa wenye mahitaji maalum waweze kusoma bila changamoto zozote,ipo haja Manispaa kukamilisha miradi hii inayosuasua kwa wakati ili itumike na wananchi kama mhe.Rais Samia SuluhuHassan alivyokusudia alisema Sendiga.

Kwa upande wake Afisa Elimu Msingi ndugu Charles Mwakalila amesema kwa mwaka wa fedha 2021/2022 wametenga bajeti ya sh.milioni 30 ambazo pamoja na mambo mengine pesa hizo  zitatumika katika ukamilishaji wa bweni hilo pamoja na uzio kwa ajili ya usalama shuleni hapo.

Katika ziara hiyo miradi mingine iliyokaguliwa ni Ujenzi wa Shule ya Sekondari ya IIsakalilo,ujenzi wa kituo cha afya Itamba na Ujenzi wa Machinjio ya kisasa ya Ngelewala

Dr.Stephen Ngwale ni Afisa  Mifugo wa Manispaa anasema shughuli zinazofanyika kwa sasa katika Machinjio ya Kisasa ya Ngelewala ni ujenzi wa kisima,kuweka mfumo wa maji moto na maji baridi,kujenga mabwawa ya maji machafu na mifereji yake .

Pia  Dr Ngwale anabainisha kuwa mradi huo ukikamilika wanatarajia kuchinja ng,ombe mia moja (100),Mbuzi mia mbili(200) kwa siku na kuwa  manufaa ya mradi huo pindi utakapoanza kufanya kazi utatoa ajira zisizo rasmi kwa zaidi ya vijana 200, kuongeza  mapato ya Halmashauri na kuimarisha usafi wa mazingira kwa kudhibiti uchinjaji holela.

Naye Mstahiki Meya wa Manispaa ya Iringa Mhe.Ibrahim Ngwada amesema  ziara ya Mkuu wa Mkoa  imewafumbua macho na kuwa kama kiongozi mkuu wa Halmashauri atahakikisha miradi inakamilika na ikiwa na ubora unaohitajika kulingana na thamani ya fedha zilizopangwa.