MAADHIMISHO YA SIKU YA WANAWAKE MANISPAA YA IRINGA YAFANA. WANAWAKE WAJITOKEZA KWA WINGI

Posted on: March 8th, 2021

MAADHIMISHO YA SIKU YA WANAWAKE MANISPAA YA IRINGA YAFANA.

WANAWAKE WAJITOKEZA KWA WINGI

Wanawake wa Manispaa ya Iringa wameungana na wanawake wote Duniani kuadhimisha kilele cha siku ya wanawake  ambayo hufanyika  tarehe 8/3 kila mwaka.

Katika Maadhimisho hayo yaliyopambwa na maandamano yaliyoanzia ofisi za Manispaa ya Iringa kuelekea viwanja vya Mwenbetogwa ambako ndio maadhimisho yalihitimishwa      nderemo,vifijo,shangwe na vigelegele vilisikika  toka kwa wanawake walioshiriki huku wakiimba nyimbo  kwa furaha.

Mgeni rasmi Mbunge wa Jimbo la Iringa mjini Mhe.Jesca Msambatavangu amesema kina mama wanaaminika katika jamii kwa kufanya mambo kwa weledi kama kauli mbiu inavyosema wanawake katika Uongozi,Chachu kufikia Dunia yenye usawa.

Mhe.Msambatavangu amewataka wanawake kugombea nafasi za uongozi na kuonyesha uwezo pale wanapopata nafasi kwa kuwa wao ni viwanda hivyo wanatakiwa kutoa bidhaa bora.

Kabla ya kilele cha maadhimisho hayo Wanawake walipata fursa ya kujengewa uwezo katika masuala mbali mbali kama Ujasiriamali,Mirathi, Sheria ya Ndoa pamoja na wanawake na uongozi.

Mstahiki Meya wa Manispaa mhe.Ibrahim Ngwada amesema  anawapongeza wanawake kwa siku hii muhimu kwao  na anathamini na kuwaunga mkono wanawake katika jitihada mbali mbali wanazozifanya katika kujikomboa kiuchumi.

Mhe Ngwada amechangia fedha kiasi cha shilingi laki tano kwa ajili ya kusaidia watoto wanaoishi katika mazingira magumu.

Sherehe hizo zilihitimishwa kwa mgeni rasmi kupokea zawadi kutoka kwa wakina mama wa vikundi mbali mbali,Taasisi za Serikali na zisizo za kiserikali ambao wamejitoa kusaidia watoto wanaoishi katika mazingira magumu.

Zawadi hizo ni pamoja na Sabuni,Madaftari,Mchele unga, Sukari, mafuta ya kupikia na  fedha kama ishara ya upendo kwa watoto hao.