MKUU WA MKOA WA IRINGA AWASHUKIA MADEREVA NA MAKONDAKTA WA DALADALA KUWEKA VIFAA VYA KUHIFADHIA TAKA NDANI YA GARI

Posted on: June 26th, 2021

Mkuu wa Mkoa wa Iringa Mhe.Qeen Sendiga amezindua kampeni ya Iringa safi iliyofanyika leo tarehe 26/6/2021 mara baada ya matembezi ya hiyari ya kuokota taka taka kwa lengo la kuhamasisha jamii kushiriki katika masuala ya usafi na utuzaji wa Mazingira

Mh.Sendiga amewataka wananchi kutimiza wajibu wao wa  kufanya usafi  bila kusubiri kuhamasishwa na viongozi kwani usafi ni jukumu la kila mmoja.  

Aidha ametoa wito kwa madereva wa daladala  na makondakta kuwa na vifaa vya kuhifadhia taka katika gari zao ili kuepusha mlundikano wa taka katika eneo la stendi kuu ya zamani unasababishwa na baadhi yao kutupa taka eneo hilo jambo ambalo linahatarisha  afya za wananchi

Mh.Eliud Mvela ni Diwani wa Kata ya Mkimbizi akimuwakilisha Mstahiki Meya  amesema  kwa muda mrefu Manispaa ya Iringa inafanya vizuri katika  mashindano ya usafi wa Mazingira  ambayo hujumuisha Majiji,Miji, na Halmashauri zote nchini na imekuwa ikishika nafasi za juu  za ushindi na kwa mwaka huu kutokana na mikakati iliyowekwa na Madiwani kwa kushirikiana na Menejimenti kwenye vikao vya ndani amemuhakikishia Mkuu wa Mkoa kuwa Manispaa itashika nafasi ya kwanza katika mashindano hayo

Abdon Mapunda ni kaimu Mkurugenzi wa Manispaa ya Iringa na mkuu wa kitengo cha Mazingira  amesema anapokea maelekezo yote yaliyotolewa na Mkuu wa Mkoa  ikiwemo kukamatwa kwa yeyote atakayeonekana kutupa taka hovyo na kuahidi kuyafanyia kazi mara moja

Paulo Myovela ni mwenyekiti wa Envibright anasema  changamoto kubwa wanazokabiliana nazo ni upungufu wa vifaa na kuwaomba wadau kujitokeza kusaidia vifaa vitakavyorahisisha utendaji kazi ili kufikia malengo

Kampeni hiyo ya Iringa safi imezinduliwa leo na kuhudhuriwa na viongozi  mbali mbali wakiwepo Waheshimiwa Madiwani,wakuu wa idara na vitengo na wadau Nipe fagio pamoja na Envibright.