MKUU WA MKOA WA IRINGA MHE: QUEEN AMEWATAKA WANANCHI KUZINGATIA USAFI WA MAZINGIRA

Posted on: October 2nd, 2021

Mkuu wa Mkoa wa Iringa Queen Sendiga amesema ni vizuri jamii ikawa na utamaduni wa usafi endelevu ili kujiepusha na magonjwa ya mlipuko na kuifanya Manispaa ya Iringa kuwa katika mazingira safi na salama

Sendiga ameyasema hayo leo  eneo la mashine tatu mara baada ya kukamilika kwa zoezi la usafi wa mazingira lililofanyika kwa ushirikiano mkubwa kati ya viongozi wa Serikali, Chama cha Mapinduzi na wafanyabiara ambapo alipata fursa ya kuongea na wananchi hao

"Usafi ni jukumu la kila mmoja wetu, usisubiri kuhimizwa kufanya usafi  hivyo kila mmoja atimize wajibu wake na nimefurahi kuona mmejitokeza kwa wingi na mmeyatendea kazi maelekezo niliyowapa miezi mitatu iliyopita  kwa sasa hali ya usafi inaridhisha alisema Sendiga

Kwa upande wake Mkuu wa Wilaya ya Iringa Mohamed Moyo ameagiza baadhi ya wafanya biashara kusafisha mitalo iliyo katika maeneo yao kwani imekuwa likisahaulika kusafishwa

Naye Mstahiki Meya wa Manispaa ya Iringa Mhe. Ibrahim Ngwada ametoa onyo kwa wale wanaochukua  vifaa vya kuwekea taka vilivyowekwa maeneo mbalimbali kwa lengo la kuweka mji safi kuacha mara moja tabia hiyo na kuwaagiza wafanyabiashara kuwa walinzi wa vifaa hivyo na kuwakamata watakaobainika kufanya hivyo

Awali akiongea na wajasiliamali Mbunge wa Jimbo la Iringa Mjini Mhe. Jesca Msambatavangu amewapongeza wafanyabiashara kujitokeza kwa wingi kufanya usafi  amesema wao ni mfano wa kuigwa

Naye Katibu mkuu mtendaji wa wajasiriamali (machinga) Ndg. Joseph Mwanakijiji amesema wanawashukuru viongozi wote wa Manispaa na Mkoa kwani wamekuwa wakipata ushirikiano  katika kutekeleza majukumu yao na kuahidi kudumisha ushirikiano huo kwa maslahi yao na taifa kwa ujumla.