NACOPHA WATOA MSAADA, MAPAMBANO DHIDI YA CORONA IRINGA

Posted on: October 12th, 2021

Shirika lisilo la kiserikali la Mtandao wa   watu wanaoishi na virusi vya UKIMWI (NACOPHA)  kupitia Mradi wa 'hebu tuyajenge' umekabidhi pikipiki mbili katika Halmashauri mbili za wilaya ya Iringa .

Akizungunza Meneja wa mradi huo kanda ya Mbeya Ndugu. Ferdnand Mazuni amesema utolewaji wa pikipiki kama hizo, pia zimetolewa kwenye Halmashauri 15 nchini zinazotekeleza mradi huo.

Hata hivyo ameendelea kusema kuwa pikipiki hizo zitasaidia kwa watenda kazi kufuatilia mwenendo wa mradi huo.

"Kwa mwitikio wa mapambano dhidi ya UVICO 19 shirika hili limekabidhi vifaa mbalimbali vya kujikinga na maambukizi ya virusi vya Corona Kwa watu wenye maambukizi ya virusi vya UKIMWI " alisema Ferdnand

Kwa upande wake Mwenyekiti wa  Umoja wa watu  wanaoishi na virusi vya UKIMWI (KONGA), Halmashauri ya Iringa Ndg. Justin Mfilinge akishukuru Kwa msaada huo alisema kuwa vitendea kazi  hivyo ni hatua kubwa ya Utekelezaji wa shughuli zao za kila siku na watahakikisha watavifanyia kazi kama inavyotakiwa.

Aidha katika maelezo yake kabla ya kupewa msaada wa pikipiki hizo wamekuwa na chanagamoto ya kutumia gharama zao binafsi katika kufuatilia taarifa kwenye Kata, ila sasa wataepuka gharama hizo.

Naye  mratibu wa  UKIMWI Tiba  Katika Halmashauri ya Manispaa ya Iringa   Dk. Godfrey Mtunzi alisema kuwa msaada huo  umekuja wakati husika na kuwa itawasaidia katika mapambano dhidi ya UVICO 19.

Pia alisema vitakasa mikono vilivyotolewa pamoja na barakoa vitasaidia katika mapambano ya UVICO 19 Katika Halmashauri ya Manispaa ya Iringa hasa maeneo ya kwenye Kata.

Kaimu mkurugenzi wa Halmashauri ya Manispaa ya Iringa, Omary Mkangama amepongeza jitihada hizo za wadau hao katika mapambano dhidi ya UVICO 19 katika Halmashauri hiyo.

Vilevile alisema Halmashauri ya Manispaa ya Iringa imeendelea na mapambano ya UVICO 19 kwa kuchukua tahadhari zote zinazotolewa na wataalam wa afya na kutaka wananchi kuendelea kuchukua tahadhari pamoja na kupata Chanjo ya UVICO 19 katika maeneo yote yanayotolea huduma hizo ikiwemo Ofisi zote za Kata.