NAIBU WAZIRI WA AFYA,MAENDELEO YA JAMII JINSIA,WAZEE NA WATOTO AAGIZA HALMASHAURI KUWAPA ENEO SHIRIKA LA DAILY BREAD LIFE

Posted on: July 8th, 2021

Naibu waziri wa Afya, Maendeleo ya jamii, jinsia wazee na watoto  Mhe.Mwanaid Khamis  ametoa agizo kwa uongozi wa Halmashauri ya Manispaa ya Iringa kuwapatia eneo kwa ajili ya matumizi ya kituo Shirika la  Daily bread life kilichopo kata ya Gangilonga ili kutatua changamoto ya ufinyu wa eneo inayowakabili

Akitoa agizo hilo katika ziara yake iliyofanyika tarehe 8/7/2021 Mhe.Khamis amesema kuwa anawapongeza walezi wa  watoto waishio katika kituo  hicho kwa kazi nzuri wanayoifanya ya  kurekebisha tabia za watoto waliopo hapo.

Aidha Mhe. Khamis amesema Serikali yaJamhuri ya Muungano wa Tanzania inawapenda  na kuwajali watoto hivyo inamipango mizuri ya  kuhakikisha watoto wanapata haki zao wanazostahili na ameahidi kushirikiana nao bega kwa bega kuhakikisha anatatua changamoto zote zilizopo.

Neema Mpeli ni Mkurugenzi wa Daily bread life  amesema Halmashauri ya Manispaa ya Iringa kwa kushirikiana na Shirika hilo ilianza kutekeleza mpango wa marekebisho ya tabia April 2020 na mpaka sasa kuna watoto 50 ambao wamepata huduma ya marekebisho ya tabia,watoto 9 kati yao tayari wamehitimu.

Bi. Mpeli amesema  pamoja na mambo mengine pia Shirika linatoa huduma mbalimbali kama ushauri nasaha  na elimu ya ujasiriamali lengo likiwa ni kubadili tabia za vijana waliokinzana na sheria

Naye Kaimu Mkurugenzi Bi. Mwantum Dossi alimshukuru mgeni rasmi kwa zawadi alizotoa katika shirika ambazo ni Michele gunia 3 kama mchango wake wa upendo kwa watoto waishio kituoni hapo na kuahidi kutekeleza maagizo yote  aliyoyatoa kwa Manispaa

Ziara hiyo ilikamilishwa kwa  kutembelea shughuli zinazofanywa na watoto waliopo kituoni ambazo ni bustani za mbogamboga, uokaji wa vitafunwa na utengenezaji vifungashio

Ester Kibiki ni mzazi wa mtoto aliyepata huduma anatoa ushuhuda wa namna ambavyo mtoto wake amenufaika kwa kipindi kifupi na amejifunza mambo mengi ambayo yamebadilisha tabia yake na kupanua uelewa na amewashukuru walezi kwa jitihada wanazofanya kuhakikisha wanatoa malezi  bora kwa watoto