NYAGAWA AONGOZA KAMPENI YA NIPE KALAMU NISOME

Posted on: September 20th, 2023

Afisa Maendeleo ya Jamii wa Halmashauri ya  Manispaa ya Iringa, Ndg. Suzan Nyagawa ameitaka jamii kumuunga mkono Mkurugenzi wa Taasisi ya Sauti ya Jamii na mwanzilishi wa kampeni ya Nipe Kalamu Nisome Ndg. Jane Mwalembe ili kuwafikia wenye uhitaji.

Nyagawa amesema hayo katika maadhimisho ya Kampeni ya Nipe Kalamu Nisome yaliyofanyika katika Shule ya Msingi Igeleke mkoani Iringa Septemba 20, 2023.

 “Wananchi wenzangu na walimu wa Igeleke pamoja na wanafunzi tushirikiane na ndugu yetu ili kumtia moyo na aweze kutimiza adhma yake njema ya kuwafikia wanafunzi wote na kujenga choo cha Shule ya Msingi Igeleke” amesema Nyagawa.  

Hata hivyo Nyagawa ametoa wito kwa wazazi na walezi watoe ushirikiano kwa walimu katika ufuatiliaji wa maendeleo ya watoto na pia wachangie michango mingine ikiwemo chakula na vifaa vya shule kama vile daftari, kalamu, na sare za shule .

“Naomba niwashukuru walimu wa Shule ya Msingi Igeleke kwa utendaji wao wa kazi kwa juhudi katika mazingira magumu, na ninawaomba muwapende hawa walimu wanafanya kazi kubwa sana” Amesema Nyagawa.