TAMISEMI YAIPONGEZA MANISPAA YA IRINGA KWA UTEKELEZAJI WA MIRADI YA MAENDELEO

Posted on: July 7th, 2021

Timu ya  ufatiliaji kutoka Ofisi ya Rais  Tawala za Mikoa na Serikali za Mitaa (TAMISEMI)imefanya ziara ya kutembelea na kukagua miradi ya Maendeleo inayotekelezwa na Halmashauri ya Manispaa  ya Iringa

Lengo la ziara hiyo iliyofanyika tarehe 7/7/2021 ni kuona maendeleo ya miradi  inayojengwa kwa kutumia fedha kutoka Serikali kuu na mfuko wa jimbo kwani ni utaratibu wa kawaida kukagua miradi hiyo kila  mwisho wa mwaka wa fedha

Sweetbert Masato ni Mchumi Mkuu Wizara ya Fedha na Mipango kutoka Ofisi ya Rais ametoa rai kwa Mkurugenzi wa Manispaa kusimamia kwa kufuata taratibu/ mwongozo  wa ujenzi wa miradi hiyo ili iweze kujengwa kwa  kiwango  kinachotakiwa kulingana na fedha zilizotolewa ili ilete tija kwa kutatua changamoto za wananchi

'Ni muhimu Halmashauri ikafuata mwongozo uliotolewa na Wizara husika kwa ajili ya ujenzi wa miradi  kwani kuna mapungufu madogo  yamejitokeza kwenye baadhi ya majengo natoa maelekezo yarekebishwe mara moja na kwa miradi iliyo nyuma ya wakati naagiza  Mkurugenzi usimamie hilo ili miradi yote ikamilike kwa wakati.Alisema Masato'  

Miradi iliyotembelewa ni pamoja na mradi wa ujenzi wa kituo cha Afya cha Mkimbizi,Shule ya Msingi Ilala, shule ya Sekondari ya Mlamke,  Umaliziaji na ujenzi wa Zahanati ya Itamba na machinjio ya kisasa Ngelewala

Omary Mkangama ni kaimu Mkurugenzi wa Manispaa ameishukuru timu hiyo  kwa ukaguzi wa miradi na kupokea maelekezo yote yaliyotolewa pia ameahidi kuyafanyia kazi kwa haraka kwa manufaa ya wananchi.