TATHMINI YA NANENANE 2020, MPANGO MKAKATI KWA MAONESHO YAJAYO

Posted on: September 18th, 2020

Halmashauri ya Manispaa ya Iringa kupitia Idara ya Mifugo na Uvuvi leo imefanya kikao cha tathimini ya mwenendo wa maadhimisho ya NaneNane kwa mwaka 2020 ambayo kwa nyanda za juu kusini zilifanyika Mkoani Mbeya kwa lengo la kuainisha changamoto na mapendekezo ya utatuzi kwa maadhimisho ya mwaka unaofuata.

Akizungumza na wadau katika kikao hicho Mkuu wa Idara ya Mifugo na Uvuvi Dkt. Steven Ngwale, amewapongeza wadau wote walioshiriki maonesho hayo na kupelekea Manispaa kuibuka washindi wa tatu katika maadhimisho hayo.

“Hii tuzo tumeipata kwasababu ya kila mmoja wetu, bila umoja tusingeweza kuwa washindi wa tatu kati ya Halmashauri 42, hii ni heshima kubwa na tuendelee na umoja huu ili mwakani tufanye vyema zaidi” alisema Dkt. Ngwale.

Mbali na pongezi hizo, ikumbukwe kuwa Manispaa ilipokea Ngao na Cheti kwa ushindi wa tatu huku mfugaji bora wa Mkoa wa Iringa Bi. Anna Gaudence mkazi wa Kata ya Kitwiru Manispaa ya Iringa alipokea Cheti Pamoja na pesa tasilimu Sh. 2,000,000.