VIKUNDI VINAVYONUFAIKA NA MIKOPO YA MANISPAA VYATAKIWA KUFANYA MAREJESHO KWA WAKATI

Posted on: June 29th, 2021

Timu ya Wataalam kutoka ofisi ya Mkuu wa Mkoa Ikiongozwa na Kaimu Katibu Tawala  Bi. Saida Mgeni imefanya ziara ya ufuatiliaji wa utekelezaji wa Miradi  ya maendeleo  inayotekelezwa na Halmashauri ya Manispaa ya Iringa kwa lengo la kuona mafanikio na changamoto katika Miradi hiyo

Vikundi viliyotembelewa ni pamoja na Envibright kikundi cha vijana kilichopo Gangilonga kinachjishughulisha na uoteshaji wa miti ya asili .Kikundi cha watu wenye ulemavu cha Amani group kilichopo Donbosco kinachojishughulisha na ufugaji wa Sungura na kikundi cha Tupendane vicoba kilichopo Frelimo kinachojishughulisha na ununuaji wa hisa pamoja na ufugaji wa kuku wa mayai

Bi.Mgeni   amewataka wanavikundi vinavyotekeleza miradi hiyo  kuwa  na umoja na  ushirikiano ili kuhakikisha  wanakuwa na mikakati ya kukuza uchumi wao

Myovela amesema kikundi cha Tupendane vicoba kinafanya  vizuri hivyo Mkurugenzi aone namna ya kutatua changamoto zao na kuwawezesha kupata eneo kubwa kwa ajili ya mradi wa ufugaji wa kuku  wa mayai ambao walianza kutekeleza tangu mwaka 2020  wakiwa na idadi ya vifaranga 200 na mpaka sasa wanafuga kuku zaidi ya 400

Aidha amevitaka vikundi vinavyonufaika na mikopo ya   Manispaa  katika  makundi ya wanawake, Vijana na watu wenye ulemavu kufanya marejesho kwa wakati ili kupata kiwango kikubwa zaidi pindi wanapomaliza mikopo hiyo na kuomba awamu nyingine pia kutoa nafasi kwa  wengine kunufaika na mikopo hiyo

'Rejesheni fedha kwa wakati ili na wengine waweze kunufaika na mikopo, fedha mlizopewa hazina riba mnaposuasua kurejesha mnawafanya wengine kukosa fursa hiyo muhimu alisisitiza Bi.Mgeni"

Benedict Dembe ni Mwenyekiti wa Serikali ya mtaa wa Muungano B. Ametoa wito kwa maafisa Maendeleo ya jamii kutoa elimu  ya ujasiriamali  kwa vikundi kwani itasaidia kuwapa uelewa wa matumizi sahihi ya fedha wanazopewa ili  waweze kutimiza malengo kusudiwa

Awali akisoma taarifa ya kikundi mbele ya Mgeni rasmi Bi.Redemta Mwinyi amemshukuru Mkurugenzi kwa kupitia ofisi ya Maendeleo ya jamii kwa kupata mkopo wa jumla ya shilingi milioni milioni 4 kwa awamu mbili ambazo zimewasaidia kukuza uchumi wa kikundi kupitia mradi huo wa ufugaji wa kuku. Na ameomba waweze kupewa fedha nyingine ili waweze kupanua eneo la ufugaji

Ziara hii ya siku tatu imeanza tarehe 29/6  hadi 1/7/2021 ambayo itatembelea miradi mbalimbali katika kata zote zilizopo Manispaa ya Iringa.