WALIOOMBA NAFASI YA KAZI YA SENSA MANISPAA YA IRINGA WAFANYIWA USAILI

Posted on: July 20th, 2022

Halmashauri ya Manispaa ya Iringa imefanya zoezi la usaili kwa walioomba nafasi ya kazi ya muda  ya  Sensa  ya watu na makazi itakayofanyika Agosti 23. 2022.

Raymond Nyenza ni Mratibu wa Sensa Manispaa ya Iringa amesema usaili unafanyika  siku mbili (2) kuanzia tarehe 20-21/7/2022 ambapo  umewahusisha makarani  wa Sensa,Wasimamizi wa Maudhui na wasimamizi wa TEHAMA.

Nyenza amesema wasimamizi wa TEHAMA wanafanya usaili  huo katika ngazi ya wilaya ambapo watafanyia usaili ofisi kuu katika ukumbi wa Manispaa  ambapo Makarani wa Sensa na wasimamizi wa Maudhui wanafanyia usaili katika ofisi za Kata zilizopo Manispaa ya Iringa kuanzia saa 3.00 asubuhi.

Nyenza amesema wamejiandaa vizuri kuhakikisha zoezi hilo muhimu linaenda vizuri  bila changamoto zozote na kuwa muitikio umekuwa mkubwa  kwani idadi ya waombaji wote ni zaidi ya watu elfu nne (4000)

Aidha Nyenza amewataka wasailiwa wote  kujiamini,kujibu maswali kwa usahihi ili waweze kufaulu katika usaili huo na hatimaye kwenda kufanya  kazi hiyo kwa usahihi kwa maslahi mapana ya Taifa letu.

Bi.Christina Mfinanga na Bw.Johnbosko Emmanuel ni wasailiwa wamesema waliomba kazi hiyo kwa kuwa wana sifa,uwezo  na wanaamini watafanya vizuri katika usaili huo hatimaye kuchaguliwa kutekeleza majukumu yatakayokuwa mbele yao kwa mujibu wa mafunzo watakayopewa .

Sensa ya watu na makazi hufanyika kila baada ya miaka kumi (10)  kwa lengo la kujua takwimu sahihi za watanzania  ili kuweza kupanga mipango ya maendeleo kutokana na takwimu hizo, kwa mara ya mwisho Sensa ya watu na makazi ilifanyika mwaka 2012.