WANANCHI KATA YA NDULI WAPONGEZA JITIHADA ZA MBUNGE NA DIWANI WAO | UJENZI MPYA SHULE YA MSINGI KIPULULU

Posted on: June 2nd, 2021

Wananchi wa Kata ya Nduli, Mtaa wa Kupululu  Manispaa ya Iringa wamempongeza Diwani wa kata hiyo Mhe. Bashiri Mtove  kwa jitihada anazofanya  kusaidia ujenzi wa Shule mpya ya Msingi ambayo itapunguza changamoto katika Sekta ya Elimu kwenye Kata hiyo

Mhe. Mtove akizungumza na wananchi hao wakati akikabidhi mifuko 30 ya saruji leo tarehe 2.06.2021 kwa niaba ya Mbunge wa Jimbo la Iringa Mjini Mhe. Jesca Msambatavangu, amesema anatamani kuona wanashirikiana vyema na wananchi katika kukamilisha ujenzi huo ambao utaleta manufaa katika jamii

Aidha Mhe. Mtove amewashukuru wananchi  kwa kujitoa kwaajili ya ujenzi huo mpaka hapo ulipofikia na kuwaahidi  kuwa ataendelea kuwashirikisha wadau wengine watakaosaidia kuongeza nguvu ya umaliziaji wa jengo hilo

Baton Zakaria Nzalarila ni Mwenyekiti wa Mtaa wa  Kipululu, ametoa shukrani kwa niaba ya wananchi  kwa Mhe. Mbunge na Diwani wao kwa kujitoa katika ujenzi huo huku akiwaomba wadau wengine kujitokeza kuwasaidia kuongeza nguvu ili kufikia malengo waliyokusudia

"Tunaamini mradi huu utakapokamilika  utatatua changamoto zilizopo katika Sekta ya Elimu na kufanya wanafunzi  kupata Elimu kwa urahisi kwani kwasasa hutembea umbali mrefu kwenda shuleni" alisema Witness Kiwele, mmoja wa wakazi katika mtaa wa kipululu 

Bi. Faustina Mdete ambaye ni Mjumbe wa Serikali ya Mtaa wa Kipululu ameeleza kuwa moja ya tatizo la watoto wao kushindwa kufanya vizuri kitaaluma ni umbali wa shule ambazo wanasoma hivyo ameiomba Serikali kuwasaidia kwa haraka ili kuepukana na changamoto hiyo