WANAWAKE, VIJANA, WALEMAVU MKOA IRINGA 'WAJAZWA MAPESA

Posted on: November 23rd, 2021

Na Mwandishi Wetu, Iringa

Waziri wa  Nchi ofisi ya Rais Tawala za Mikoa na Serikali za Mitaa (TAMISEMI),   Ummy Mwalimu amekabidhi mfano wa hundi yenye thamani ya shilingi bilioni 1,143 ,749,140  iliyotolewa kwa vikundi vya wanawake,vijana na watu wenye ulemavu Mkoani Iringa.

Mhe.Ummy amekabidhi hundi hiyo leo Novemba 23, 2021 kwenye kongamano la uwezeshwaji wanawake kiuchumi na kijamii tukio ambalo lilishuhudiwa na viongozi mbalimbali wa chama na Serikali na kufanyika ukumbi wa Kichangani Manispaa ya Iringa.

Alisema ni jukumu la kila Halmashauri ya wilaya na Mji kuhakikisha zinatenga asilimia kumi ya mapato yake ya ndani kwa ajili ya kuwawezesha kiuchumi wanawake,vijana na watu wenye ulemavu.

"Sitamuonea aibu Mkurugenzi yeyote ambaye hatatenga na kutoa fedha kwa wanawake, Vijana na watu wenye ulemavu," alisema Mhe.Ummy.

Awali akimkaribisha mgeni rasmi, Mkuu wa Mkoa wa Iringa, Mhe.Queen Sendiga alisema lengo la kongamano hilo ni kuwaunga mkono kinamama wajasiriamali,  kujadili fursa za kijamii, kupeana uzoefu na kujifunza kwa waliofanikiwa na namna ya kutatua changamoto zinazojitokeza.

Naye Mbuge wa jimbo la Iringa mjini, Mhe Jesca Msambatavangu,  aliwaasa kina mama kuwalea watoto wao vizuri kwani kwa kufanya hivyo itapuguza matukio ya ubakaji na ulawiti .

Katika kongamano hilo mada mbalimbali zilitolewa   pamoja na ulinzi na usalama kwa mtoto, Uchumi,Afya ya akili,Saikolojia na  lishe.

Jumla ya vikundi 131  vimenufaika na mkopo wa wanawake,vijana na watu wenye ulemavu ambapo Halmashauri ya Manispaa ya Iringa  wametoa sh milioni 92,000,000 kwenye vikundi 23 kwa kipindi cha Julai-Septemba,

Halmashauri ya wilaya ya Iringa wametoa sh m 272.,000,000 kwa vikundi 33 huku kilolo wakitoa sh m 204,000,000 ambazo zimetolewa kwa  vikundi 15

Mafinga imetoa  shilingi  m 249,169,140 kwa vikundi 11 na Mufindi wametoa jumla ya sh m.326,580,000  kwa vikundi 19.