WATAALAM SEKRETARIETI MKOA/MANISPAA YA IRINGA WASHAURIWA KUSHIRIKISHA WANANCHI KATIKA SHUGHULI MBALI MBALI

Posted on: July 20th, 2021

Wataalam kutoka Sekretarieti ya Mkoa na Manispaa ya Iringa wameshauriwa kuimarisha mifumo iliyopo katika Sekta za  umma kwa kuishirikisha jamii katika masuala mbalimbali ili kuimarisha utawala bora.

Nazar Sola ni Mshauri wa Utawala Bora na Ushirikishwaji wa Wananchi Mradi wa Uimarishaji mifumo ya sekta za umma  PS3+ akitoa mafunzo katika   ukumbi wa mikutano wa Manispaa amesema  jukumu lake kubwa ni kujua namna gani mikutano  ya kisheria inafanyika, namna ambavyo  tovuti za Halmashauri na za Mikoa zinaendeshwa na zitoe taarifa gani kwa wananchi,namna gani matumizi ya mbao za matangazo yanasimamiwa na kuratibiwa  na jinsi gani  masanduku ya maoni yanaratibiwa.

Aidha Sola amesema Utawala Bora na ushirikishwaji jamii unatekelezwa katika mikoa 13  ambayo ni Kagera,Mwanza,Mara, ,Kigoma,Rukwa,Mbeya, Iringa Shinyanga,Njombe,Dodoma, Morogoro, Lindi na Mtwara ambapo wamebaini mapungufu kidogo ikiwemo kusahaulika kwa wananchi wa hali ya chini kwa kutokushirikishwa katika masuala ya kijamii kutokana na njia zinazotumika kutoa taarifa kutowafikia.

Sola amesema ipo haja ya kuwafikia wananchi hao ambao hawawezi kupata taarifa kupitia Radio,Luninga,au magazeti na wanaoshindwa kufika kwenye mbao za matangazo kwa kuwafata katika maeneo ya mikusanyiko kama vile maeneo ya masoko,vituo vya mabasi,kwenye nyumba za lbada, zahanati, vituo vya afya na Hospitalini kwa kubandika matangazo maeneo hayo kwa lengo la kuwapa taarifa wananchi

Asha Kitegile ni kaimu Mkuu wa Idara ya utawala na Rasilimali watu  ameshukuru kwa mafunzo hayo na kuahidi kuyatendea kazi mapungufu yaliyojitokeza kwa manufaa ya Manispaa na jamii kwa ujumla

Mkutano huo wa siku moja umefanyika tarehe 20/7/2021 ambapo umewashirikisha  wajumbe kutoka sekretarieti ya  Mkoa pamoja na baadhi ya wakuu wa Idara na vitengo, kutoka Halmashauri ya Manispaa ya Iringa.