WATU WENYE ULEMAVU WAPEWA VIUNGO VYA BANDIA MANIAPAA YA IRINGA

Posted on: February 19th, 2021

Watu wenye ulemavu wametakiwa  kutumia fursa ya kupewa viungo vya bandia ili kufanya shughuli zao za kuwaletea maendeleo na kuawainua kiuchumi kiurahisi

Hayo yamesemwa leo tarehe 19/2 /2021 na Naibu Waziri ofisi ya Waziri Mkuu anayeshughulikia watu wenye ulemavu Ummy Nderiananga katika Ukumbi wa Orofea uliopo Manispaa ya Iringa ambapo alikuwa mgeni rasmi katika shughuli ya ugawaji wa viungo vya bandia

Mh.Nderiananga amesisutiza kuwa walemavu siyo watu wadhaifu bali wana uwezo wa kufanya shughuli yeyote kwa ufanisi kama watu wengine  hivyo kuwashukuru kampuni ya Kamal ambayo imewapa walemavu wa Manispaa vifaa bila gharama  yeyote vifaa hivyo vimewapa  ujasiri zaidi wa kuweza kufanya shughuli zao bila hofu yeyote na kwa ufanisi hivyo kuwaongezea kipato na kutegemewa katika familia na jamii kwa ujumla

Aidha waziri ameishukuru kampuni ya Kamal kwa moyo wa upendo waliouonyesha na kurudisha matumaini yaliyopotea kwa walemavu hao

Pia amemshukuru Mhe.Mstahiki Meya Manispaa kwa mikakati mizuri alinayo juu ya walemavu.

Mwakilishi wa chama cha mapinduzi Mkoa katibu Said Kaduro amewataka walemavu kutokukata tamaa badala yake kuwa wajasiri katika kutafuta maendeleo kwani uwezo na nguvu wanazo.

Pia anawashukuru Mbunge na Mstahiki Meya pamoja na watendaji wote kwa kutekeleza Ilani ya Chama cha Mapinduzi

Mstahiki Meya Manispaa ya Iringa mhe.Ibrahim Ngwada amesema  ataendelea kuunga mkono  jitihada za wadau wanaotaka kutoa Misaada kwa watu wenye ulemavu ili  kuhakikisha wanafanya hivyo bila kupata vikwazo

Mh. Rita Kabati Mbunge viti maalum Mkoa wa Iringa  amesema anatambua na kuthamini jitihada zilizofanywa na timu ya madaktari kutoka kampuni ya Kamal kwa moyo wao wa kipekee kwa huduma nzuri ya kuwapima mpaka kuwapatia viungo vya bandia  ambavyo vitarahisisha maisha na utendaji kazi wa watu wenye  ulemavu Zaidi ya 51

Mh.Rita amekemea tabia ya baadhi ya watu kuwatumia walemavu kama kitega uchumi amesema jambo hilo halileti afya katika jamii yetu

Aidha mh.Kabati amemuomba Naibu waziri kuangalia namna ya kuwasaidia kinamama wanaojifungua watoto wenye ulemavu kwani mara nyingi waume zao huwanyenyepaa na  kuwakimbia hivyo kujikuta katika wakati mgumu wa kulea watoto hao peke yao

Kampuni ya Kamal ya Jijini Dar es Salaam inajihusisha na kutengeneza vifaa vya bandia kwa walemavu Nchini Tanzania tayari wamekwishatoa vifaa zaidi ya 3500 na wanatarajia kugawa vifaa 2500 kwa kipindi hiki na kwa Manispaa ya Iringa wametoa vifaa 51 na kuwapima walemavu 32