WENYEVITI WA MITAA WAASWA KUWALINDA WATOTO DHIDI YA VITENDO VYA UKATILI

Posted on: January 12th, 2021

Mstahiki Meya wa Manispaa ya Iringa Mhe. Ibrahim Ngwada ametoa wito kwa wenyeviti wote wa Serikali za mitaa  Manispaa ya Iringa kuwalinda watoto na ukatili wa kijinsia  kwani kwa kufanya hivyo itasaidia kupunguza wimbi la matukio ya ulawiti na ubakaji ndani ya Manispaa yetu  

Hayo yamesemwa leo tarehe 12/01/2021, katika ukumbi wa Orofea  ambapo Mhe. Ngwada alikuwa mgeni rasmi katika mafunzo ya siku tatu ya ulinzi na usalama wa mtoto kwa wenyeviti hao

Mhe. Ngwada amesema kesi nyingi za ukatili mara nyingi zinaishia kwenye mitaa  kwani wahusika wa vitendo hivyo ni kama majirani, ndugu wa karibu au marafiki wa karibu wa waathirika wa ukatili hivyo amewataka wenyeviti kutokuyafumbia macho matukio hayo bali kuwajibika kikamilifu kuhakikisha wanamaliza kabisa tatizo hilo katika mitaa yao

Nae Mwenyekiti wa Umoja wa vijaja CCM Wilaya ndugu Salvatory Ngelela amesema ustawi wa vijana katika jamii unategemema sana usalama wa watoto hivyo kuitaka jamii kuwalinda watoto waweze kutimiza ndoto zao

Tinieli Mbaga ni Afisa ustawi wa Jamii Manispaa ya Iringa awali akimkaribisha mgeni rasmi  amesema lengo la mafunzo hayo kwa wenyeviti wa mitaa ni kuwajengea uwezo ili waweze kudhibiti wimbi la vitendo hivyo viovu ambavyo vimekuwa vikishamiri siku hadi siku dhidi ya watoto wetu

Naye Mwenyekiti wa Mtaa wa Gangilonga Dr. Mengele ameshukuru kupata mafunzo hayo kwani yatawasaidia kupambana na matukio ya aina hiyo na kuwa hawako tayari kuyafumbia macho  katika mitaa yao watahakikisha sheria inafata mkondo wake dhidi ya watuhumiwa watakaobainika